خالق فيريدون ايبراهيمىلرى اونوتمادى!

خالق فيريدون ايبراهيمىلرى اونوتمادى! اونلارى اؤز اوره يينده ياشادير!

آذربايجان خالقى فيرقه ميزين و شهامتلى فداييلريميزين يالنيز آذربايجانا دئييل٫ بوتون ايرانا ائتدييى تاريخى خيدمتلرى ايللرله٫ يوز ايللرله ياد ائده جكدير. سئييد جعفر پيشه ورى

آشاغيداكى يازى گجيل سايتيندان آلينيبدير. (يازى 21 آذرجه ائديت ائديلميشدير).

عابباسي خليفه لرينين ايستيبدادينا، پهلوي ظولمونه و ايستئعمارچيلار حؤكمرانليغينا قارشي آمانسيز موباريزه لرده، آذربايجان خالقي هميشه بيرينجي موباريزه سنگرلرينده اولموشدور. خالقيميزين آزادليق اوغروندا موباريزه لرينين ان ياخشي صحيفه لري آذربايجان قهرمان اوغوللارينين قانىيلا يازيلميشدير.

ايكينجي دونيا ساواشينين باشلانقيجيندا، آزادليق سئوه ن خالقيميز اؤز موباريزه سيني سئييد جعفر پبشه ورىنين رهبرلييي ايله قالديردي و ايستئعمار قالاسينا هوجوم ائتدي. بيرينجي اولاراق ميللي حؤكومت ياراتدي. تئهران حؤكومتي اؤزونون خاريجي آقالارينين حيمايه سيندن ايستيفاده ائدره ك ايستئعمار بايقوشونون قانادي آلتيندا “آذربايجانى فتح ائتمك سفري” آدلانان مشهور ننگين يوروشه باشلادي و آذربايجان خالقينين الده ائتدييي آزادليق و دئموكراسيني قان ايچينده بوغماغا موفق اولدو.

1325 نجي ايل آذر آييندا هوجوم باشلانان تاريخدن آذربايجان طوفانلي بير صحنه يه چئوريلدي. بو مئيدانين بير طرفينده جللادليق، آلچاقليق، معنوي دوشگونلوك و ساتقينليق و باشقا طرفينده ايسه ايگيدليك، شهامت و آزادليق اوز- اوزه دوردولار. تئهران حؤكومتينين هله پيش قاراووللاري زنجانا گيرمه ميش بوتون شهر قانا بوياندي. آذرين ايكينجي گونو آچيق فيكيرلي روحاني شيخ محمدعلي خوئيني اؤز محضرينده اؤلدورولوب جنازه سي دامدان يئره آتيلدي.

25- 26 آذر گونلرياردبيل اوچون ان آجيناجاقلي خاطيره لر گونو ايدي. شهيد اولانلار او قده ر چوخ ايديلر كي گل- گئت يولو باغلانميشدي. ايسماعيل عبدالرحيم اوغلو حكاك “ساري ايسماعيل”، ديبائيان و باشقا شهيدلرين جنازه لريني قارا گروهچولار شهرين هر طرفينده دولانديريرديلار. اردبيل شهرينين فرمانداري خليل آذربادگاني “خليل دائي” ني اوچ دفعه دارا چكديلر. هر دفعه اونو ياريم جان هوشا گتيريب يئنيدن آسديلار. او دار آغاجينين ديبينده اوجا سسله دئدي: " من وطن يولوندا اؤلدورولورم، سون غلبه حق و آزادليقلادير. ياشاسين آزاد آذربايجان."

آزادليق دوشمانلاري ايگيد شاهسئوه ن قيزي “سريه” ني بئش گون تك جانينا موحاصيره ده موقاويمت ائتديكدن سونرا نامردجه سينه شهيد ائتديلر. او گولله نركن " آذربايجان اوغوللاري منيم اينتيقاميمي آلاجاقلار." دئدي.

آذربايجان دئموكرات فيرقه سينين اورمو تشكيلاتينين صدري محمدامين آزاد وطن، نورالله يكاني، معارف رييسي آستارالي شكيبا، حيدري و باشقالاري موباريزه آپارديلار و بير بيرينين قوينوندا ابدي يوخويا گئتديلر.

جينايتكارلار تبريزده، مجلس كيتابخاناسي، ميللي اوركئستر، دؤولت فيلارمونيسي و تيياتري غارت ائتديلر. سرداريله سالار ميللىنين ميجسسمه لري سينديريليب يئرينه ريضاخانين عكسي قويولدو. ايستئعمار هيولاسي آزادليق فيريشته سينين يئرينه اوتوردو. شاهين قوشونو تبريزه سوخولدوقدان سونرا يئنه مدرسه لر و ايداره لرده ديليميزين رسمي ايشله نمه سي ياساق اولدو. 1325 نجي ايل آذرين 22 سينده تبريزده دانيشسرا مئيدانيندا توركجه كيتابلار قالانيب يانديريلدي.

ميللى حؤكومتين ساوجىسى (پروكورورو٫ دادسيتانى): فيريدون ايبراهيمى

آذربايجان خالقي نين ايگيد اوغلو “فريدون ابراهيمي-فيريدون ايبراهيمى” پارلاق اولدوز كيمي باشقا شهيدلر ايچره سينده پارلاييردي. او آلتي آي ايشكنجه چكديكدن سونرا دا شجاعتلي، مغرور و تسليم ائديلمز قالدي. ايندي او آذربايجان ايگيدينين بييوگرافىسينى خاطيرلاديريق:

فيريدون ايبراهيمي 1297 نجي گونش ايلينده آستارا شهرينده آيدين بير عاييله ده آنادان اولموشدور. او ايبتدايي تحصيلاتينى آستارادا آلميشدير. آتاسي ميرزا غني 1308 نجي ايلده سياسي ايتتيهاملا حبسه آلينميش و بير نئچه ايل زينداندا قالاندان سونرا نهاونده تبعيد اولموشدور. او اؤز زامانينين آيدينلاريندان ساييليردي. فيريدون تئهراندا حوقوق فاكولته سينده تحصيل آلديغي زامان خوصوصي تدريس، روزنامه لره مقاله يازماق واسيطه سيله اؤزونون گونده ليك ياشاييشيني تامين ائديردي. ايكينجي دونيا ساواشي ايللرينده او تئهراندا ياييلان روزنامه لردن و هابئله دئموكراتيك مطبوعاتينين بير نئچه سينده ايشتيراك ائتميش و چوخ كسرلي سياسي مقاله لر يازميشدير. بو سيرالاردا فيريدون، آذربايجانين اولو اؤنده ري خالقيميزين اوره يينده ياشايان و ميللي حؤكومتين باشچيسي سئييد جعفر پيشه وري ايله تانيش اولور. اونون “آذربايجان دانيشير” آدلي سيلسيله مقاله لري تاريخي گئچميشيميزي بير داها خاطيرلاداراق، خالقي آزادليق اوغروندا دؤيوشلرده روحلانديريردي. او بئله يازيردي: " منيم مقصديم بودور... اؤز حقيقي مقامي و مووقئعييتيني الده ائتمك اوچون بو گون قييام ائده ن آذربايجان ميللتيني آزاد دونيايا تانيتديرماق ايسته ييرم. بشرييتين مدنييت تاريخينده آذربايجانين نه كيمي بير مقاما ماليك اولدوغونو گؤسترمك ايسته ييرم..."، او بو مقاله لرده اؤز خالقينين پارلاق تاريخيني خاطيرلاداراق سونسوز بير ايفتيخار حيسسي ايله قئيد ائديردي: " آذربايجان موقددس ابدي اودلار اؤلكه سيدير. بو عزيز تورپاغين هر بير قاريشيندا ايفتيخارلي بابالاريميزين اونودولماز ياديگاري قالير. اونون گئچميشده كي عظمتلي قالالارين قاليقلاري و موقددس آتش لرينين اثرلري بيزيم بؤوك آتالاريميزين پاك روحو و سارسيلماز ايناميني گؤسترير..."

او آ. د. ف مركزي كوميته سينين اورگاني اولان “آذربايجان” روزنامه سينين تحريريه هئيتي ايله ياخيندان امكداشليق ائدير. 1325 نجي ايلده ايبراهيمي پاريسده تشكيل اولونموش صولح كونفئرانسينا آذربايجان مطبوعاتينين نوماينده سي عونوانيله گؤندريلدي. ايبراهيمي دئموكراتيك مطبوعاتيميزين گؤركملي خاديمي كيمي اؤز قلمي، بيليك و باجاريغي ايله خالق حركاتين٫ 21 آذر نئهضتينين غلبه سي اوغروندا چاليشميشدير. 21 آذر نئهضتينين غلبه سيندن سونرا آذربايجان دئموكرات فيرقه سينين و ميللي حؤكومتين باش مدعي العمومي تعيين ائديلدي.

نهايت 1325نجي ايلين آذر آييندا شاهنشاه قوشونلاري خايينجه سينه آذربايجانا سوخولدوقدان سونرا ايبراهيمي ده حبسه آلينير. او زينداندا دا موباريزه دن ال اوزمور. نهايت آلتي آي حبسده ساخلانيلديقدان سونرا، اونو جومعه گونو 1326 نجي ايل خورداد آيينين بيرينده تبريز شهرينده دارا چكيرلر. او گون آذربايجان خالقينين عومومي عزا گونو ايدي.

ميللي نهضتيميزين و دئموكراتيك ادبيياتيميزين گؤركملي قوللوقچوسو اولان فيريدون ايبراهيمي آزادليقلا اسارت آراسيندا گئدن دؤيوشون گؤركملي قهرمانلاريندان و يئني نسلين موباريزلريندن بيري اولموشدور. ائله بونا گؤره ده اونون خاطيره سي 21 آذر نئهضتيله ابدي له شير و ابدي له شه جكدير. بئله نقل اولونور:

شاهين قوشونو مييانايا ياخينلاشميش گونلر ايدي. بيريسي تله سيك اوتاغين قاپيسيني آچيب ايچري گيريب دئدي: " تئز اولون ايندي قيز كؤرپوسونون پاتلاماسيندان يئتيشيرم، دورون گئده ك. ميللي حؤكومتين داديستاني اولان آستارالي فيريدون ايبراهيمي سوروشدو: هارا؟ دئدي: او تايا. ايبراهيمي جاواب وئردي: بو تايدا كي هله بيز روسلارين الينده دئييلديك بيزيمله نئيله ديلر كي ايندي اونلارين اووجونا گيره ك. من بيليره م كي بوردا باشيما نه گله جكدير، آمما من اؤز يوردومدا قاليب جانيمي اونا قوربان وئره جه يم. ايبراهيمي قالدي و تبريزده گولوستان باغيندا دار آغاجي آلتينا گئدنده سورمئيي كوت- شالوار گئيميش و ياخاسينا قيرميزي گول تاخميشدي.

توپلانما يئري : تبريز- اماميه قبريستانليغي- فيريدون ايبراهيمىنين مزاري اوستو
زامان: 1382 آذرين 21ي- گون اورتادان سونرا- ساعات16