فريدون ابراهيمی لرين ايدئياسينين حياتا گئچمه سی اوميدی گوجله نير

فريدون ابراهيمىلرين ايدئياسينين حياتا گئچمه سی اوميدی گوجله نير

جی ايل خرداد آينين بيرينده آذربايجان ميلللی حؤکومتين باش مدعی العمومی (دادستان کل) فريدون ابراهيمی شاه رئژيمينين حربی محکمه سينين امری ايله دارا چکيلميشدير٠

http://www.adf-mk.org/Y/f.i.jpg

فريدون ابراهيمی آزادليق و دموکراتيا اوغروندا مبارزه آپاران آذربايجانين گورکملی ضياليلاريندان بيری دير. او حقوق شناس و تانينميش سياسی خادم کيمی اوز خالقينا خدمت اوچون مبارزه يه قوشولموشدور و خالقين انقلابچی اوغلو ايدی. او انقلابی محيطده تربيه آلميشدير. او زامانکی آستارا شهری اولکه نين آزادليغی اوغروندا مبارزه آپاران گورکملی انقلابچيلار يئتيرميشدير. فريدون ابراهيمی نين عائله سی بو مبارزلرين اون سيراسيندا ايديلار. فريدونون آتاسی، ميرزه غنی ابراهيمی آزادليق ايده ياسينا اورکدن باغلی ايدی. او رضاخان پليسی طرفيندن حبسه آلينديقدان سونرا، دشمنه تسليم اولماسين دييه، آستارا زندانيندا اوزونو يانديرماغا جهد گوسترميشدير. بئله ليکله بو عائـله آزاد دوشونجه لی عائـله اولموش، اوز خالقينين آزادليغی اوغـروندا اولومدن بئله قـورخماميشدير٠ او زامان ميرزه غنی حبسه آلينار کن، صادق خان زمانی، ممی و فرضی دهقان و طاهری قارداشلاری دا حبسه آلينديلار. محاکمه اولونوب، اوزون مدتلی زندانا محکوم ائديلديلر. سونرا ايسه نهاوند شهرينه سورگون اولدولار. رضاخان ديکتاتوراسی يخيلديقدان سونرا باشقا زندانيلر کيمی ابراهيمی عائله سی ده اوز دوغما شهرينه قايتديلار. يئنی شرايطده آزادليق و ملی حقوق اوغروندا مبارزه آپارانلارين سيراسينا قوشولدولار٠

فريدون ابراهيمی تهران اونيورسيتينده اوخويارکن، اطلاعات قزئتی و باشقا قزئتده پيشه وری ايله امکداشليق ائديب، و اولکه نين سياسی حياتيندا فعال اشتراک ائديردی. آذربايجان دموکرات فرقه سی تشکيل ائديلديکدن سونرا او تبريزه گليب، فرقه نين سيرالاريندا فعاليت گوستردی. ۲۱ آذر حرکاتی غلبه چالديقدان سونرا، آذربايجان نين باش مدعی العمومی تعيين ائديلدی٠ فريدون ابراهيمی نين باجيلاری، ايرج و ايراندخت دا آستارا شهرينده قادينلار تشکيلاتيندا فعاليته باشلاديلار. فريدون ابراهيمی نين قارداشی، انوشيروان ايسه فرقه نين جوانلار تشکيلاتيندا فعاليت گوستردی. او آذربايجان ملی حکومتين تشکيل ائتدييی افسرلر مکتبينين مداومی اولدو٠

فريدون ابراهيمی آذربايجان ملی حکومتين قانون و قرارلارينين اجرا ائديلمه سينده عدليه ارقانلاريی اوزه رينده جدی نظارت ائديردی. او دوورده اوز باشيناليقلارين قارشی سی سرعتله آليندی. «قارنی يئرتيق» کاظم کيمی قولدورلارين اعدام ائديلمه سی ايله تبريز شهرينده تام تهلوکه سيزليک برقرار ائديلدی. ملی حکومت تشکيل تاپديقدان سونرا تکجه تبريز يوخ، بوتون آذربايجاندا امن و امانليق ياراندی. سويقونچولوق و قولدورلوغا و دولت اداره لرينده رشوت خورلوغا و سوروندورمه چيلييه سون قويولدو٠ آذربايجان ملی حکومتين قانونلارينين اجرا ائديلمه سينده باش مدعی العمومی کيمی فريدون ابراهيمی نين فعاليتی اونودولماز دير٠

شاه قوشونلاری آذربايجانا يوروش ائتديکدن سونرا بير چوخ تانينميش مبارزلر کيمی فريدون ابراهيمی ده حبسه آليندی. اونون عائله سی مهاجرت ائتمک مجبوريتينده قالدی. فريدون ايسه مستبد شاه رژيمینين حربی محکمه سينده محاکمه ائديلدی. آذربايجان و ايران خالقلارينين آزادليغا قووشماسی اوغروندا مبارزه آپاران فريدون ابراهيمی دارا چکيلدی. او، مردليکله اولومی قارشيلادی. بو يوروشده ۳٠ مينه ياخين آذربايجانلی مبارز قتله يئتيريلدی. مينلرله عائله خوزستان و لرستانا سورگون ائديلديلر. لاکين شاه رژيمی بونونلا اوزونو دايمی سوقورتا ائده بيلمه دی. ايرانين آزادليق سئون خالقلاری آياقا قالخديلار و سلطنت رژيمی دئوريلدی. محمدرضانين قانلی ديکتاتورلوغونا سون قويولدو و ايران آزاد بير اولکه يه چئوريلدی٠

مهاجرتده ياشايان ۲۱ آذر اشتراکچيلارين بير چوخو او جمله دن انوشيروان و ايراندخت ابراهيمی لرده آزاد اولکه يه قايتديلار و اوز خالقينين آزادليغی اوغروندا مبارزه آپاران قوه لرين سيرالارينا قوشولدولار. لاکين چوخ کئچمه دن، آزادليق بوغولدو. بير چوخ مبارزلر کيمی انوشيروان ابراهيمی ده اعدام ائديلدی. ايراندخت ابراهيمی ايسه ايکينجی دفعه مهاجرت ائتمه يه مجبور اولدو٠

ايران خالقلاری او جمله دن آذربايجان خالقی يئنی مرحله ده ياشايير. ايکی خرداد۱۳٧۶- جی ايل ايران تاريخينده آزادليق نسيمی نين اسمه سی کيمی داخل اولدو. بو تاريخی گون کشمه کشلی دوورون باشلانقيجی اولسادا، آزادليغين اولکه ده تام برقرار ائديلمه سينه قارشی، مانعلر اورتايا چيخسادا، آزادليق و ملی حقوق اوغروندا مبارزه داوام ائدير و فريدون ابراهيمی لرين ايده ياسينين حياتا کئچمه سی اميدی گوجلنير٠

آذربايجان دموکرات فرقه سی