بير گئجه اونونلا آستارادا ايكن

بير گئجه اونونلا آستارادا ايكن- اصغر فردي

روستم علييئف´له سون گؤروشون خاطيره سي: اصغر فردي

ــ «…سعدي صانكي منيم ايران سفرلريم باره ده دئميش بو جمله ني: به خاطر داشتم كه چون به درخت گل رسم دامني پر كنم هدية اصحاب را. چون برسيدم بوي گلم چنان مست كرد كه دامنم از دست برفت». بونو دئدي و اوزون بير صوصقونلوغا قاپيلدي.

اونو صون يولچولوغونا گؤنده ريرميشم دئمك. سن دئمه بيرداها گؤروشمه يه جه ايديك. گومان ائله بونا گؤره ده قوجا كيشي ياتماق ايسته ميردي.

گئجه ياريسي دينجه لمك و بير آز هوش قاپماق اوچون مهمانسراي آستاراداكي اوطاغيميزا چكيلديك. كيشي ياتماغا صويوندو گؤزلريني يومدو و خورولداماغا باشلادي. خورولتوسو ايله قاه ـ قاه گولمه سسلري بيربيرينه قاريشدي. گولمكدن اويانيب اوتوردو. دورمادان گولوردو، قاققيلداييردي. «من خورتداديم» دئيه يئنه گولوردو. نه ده اوزدن گئتمه ين آغجاقانادلاري وارميش بو آستارانين دئييردي. صانكي آغجاقاناد اونو قيديقلاييرميش او ميغميغانين صانجماسيندان دا گولوردو. دوغروسو مني ده گولمك توتموشدو.

يئنه ياتدي و يئنه خورولدادي.

و … يئنه يوخو ايچينده شاققيلداييب گولوشمه يه باشلادي. غريبه بير ايچدنليكله گولوردو. بو دفعه آستارالي تاكسي سوروجوسونون سؤزو يوخودا يادينا دوشموشدو.

آستارا سرحدلر آچيلديقدان صونرا يامان بير سرعتله بؤيومكده ايدي او قدر كي بيز رستم معلم له آستاراني اؤلچه-اؤلچه مهمانخاناني ايتيرديك و بير تاكسييا مينمه يه مجبور اولدوق تاكسي شوفري بيزه «ايستيئيسوز سيزي ده نزه چكيم؟» دئدي. بيز بير آنليغا بو سؤزدن شاشيرصاقدا ديلچي فيلان اولدوغوموز اوچون همن، اونون نه دئمك ايسته ديگيني آنلايينجا سوءتفاهم رفع اولموشدو. سن دئمه آستاراليلار دريايا (دنيزه) «ده نز» دئيه رلر. بودا بير خئيلي گولمه ميزه سبب اولدو. و گئجه يوخونون ايچينده رستم بيگي گولدورن ده ميغمالار يوخ بو ده نيميزه چكيلمه سي مسئله سيايميش دئمك. رستم معلم گولمكدن آمان تاپديقجا او سؤزو تكرارلاييردي…ده نزه چكيم !

دوروب تكرار گئيينديك ـ كئچينديك و يولا قويولدوق. باش آليب دنيزه دوغرو گئديرديك. قارامسار بير جوان كؤپك ده قويروغونو بولايا ـ بولايا داليميزجا دوشموش بيزيمله گليردي. ملايم بير اَسينتي بيزيم يارالي گؤزلريميزي اوخشاييردي. صويوق آيازدا ايستي بير يئل ده بعضاً اوزوموزه توخونوردو غريبه ايدي بير بينا قاپيسي نين قاباغيندان كئچسه ايديك ائله بيلرديك كي ايستي اوردان گلير . او ايسه بيز آچيقليقدان كئچيرديك. من بير آز صاغا ـ صولا هرله نديم. نهايت ايستينين آچيق بير دالان كيمي اوستوموزه اسديگيني سئزديم. رستم ده كئفليلر كيمي او ديوار سنين بو ديوار منيم ائله ييردي. اودا ايستينين جهتيني آختاريرميش. ايستي دريانين اوز به اوزوندن اسيردي. رستم، «آده زلزله اولور» دئيه آدديملاريني سرعتله نديردي. گؤزلريميز اراده سيزجه گؤيه چكيلدي. گؤيده قيپ ـ قيرميزي قيزارميشدي. باشيميزين اوستونده گؤي آلوو تپيردي. بير آندا باشيم گيجه لله نمه يه باشلادي. آياقلاريمي چتينليكله چكه بيليرديم. لپه لرين اؤنلنديريلمه سي اوچون ساحله دوزولن صيلديريم قايالارين اوستونده ايديك آرتيق. دنيزه چاتميشديق رستم قولتوغوما صوخولوب منه توتوندو. «گؤزلريم قارالير» دئدي. «دنيزمي توتوب مني؟» صوروشدو.

افقه زيلله نيب ايره لي گئديرديك. من باريتون سسله بير سؤزلري اوخوماق اوچون سسيمي باشيما آتميشديم. رستم نارين نارين آغلاييردي. اوزوموزه چيسگسن اوتورور كيمي هردن ياغيش چيله نيردي و دامجينين دوشدويو يئر كؤزه صو تؤكولور كيمي سسله نيردي. رستم چوخ شاعرانه تيتره ك بير سسله منه بو مصراعلاري اوخودو:

بـنال بـلبـل اگـر با مــنـت سـر يـاري است
كه ما دو عاشق زاريم و كار ما زاري است

صو گؤبگيمه چاتان كيمي بيردن رستمه باخديم آخي اونون بويو مندن آلچاق ايدي. بيردن بوغولار دئيه اونو توتماغا چالشديم او تنها صونا كيمي دنيزين اوزونده سوزور،... اوزوردو...
گئتدي و گؤزلردن ايتدي.

تهران ـ 1379 ايل بايرامي